Get Adobe Flash player

தமிழகம் மற்றும் புதுவையின் கடலோர மாவட்டங்களை கஜ புயல் மோசமாக பாதித்துள்ளது.
கஜ வேதனை: "இதிலிருந்து எப்படி மீளப் போகிறோம்னு தெரியல" - கண்ணீர் சிந்தும் மக்கள்

நாகப்பட்டினம் மாவட்டத்தைக் தாக்கிய கஜ புயல், பெரும் சேதத்தை ஏற்படுத்தி அப்பகுதி மக்களின் வாழ்வாதாரத்தை சீர்குலைத்துள்ளது. இதிலிருந்து அவர்கள் மீள்வதற்கு வெகு நாட்களாகக்கூடும்.

நாகப்பட்டினத்தில் இருந்து வேதாரண்யம் செல்லும் பாதை மிக அழகானது. சிறிய தார்ச் சாலைதான் என்றாலும் இருபுறமும் மரங்களும் சிறிய வீடுகளும் கடைகளுமாக ஒழுங்கும் நேர்த்தியுமாக காட்சியளிக்கும். அங்கிருந்து பிரியும் சாலைகளில் சென்றால் மூன்று முதல் ஐந்து கிலோ மீட்டர் தூரத்தில் கடற்கரையையும் மீன்பிடி கிராமங்களையும் அடைந்துவிட முடியும்.

puyal 02

பெரிதாக வேலைவாய்ப்பு ஏதும் இல்லாத இந்த மாவட்டத்தில் விவசாயம், தோட்டவேலை, சிறிய கடைகள், மீன் பிடிப்பு ஆகியவையே பிழைப்பிற்கு ஆதாரம். ஆனால், கடந்த வெள்ளிகிழமை அந்தப் பகுதியை சூறையாடிய கஜ புயல் ஆயிரக்கணக்கான குடும்பங்களின் வாழ்க்கையை புரட்டிப்போட்டிருக்கிறது. நாகப்பட்டினத்திற்கும் வேதாரண்யத்திற்கும் இடையில் கரையைக் கடந்த அந்தப் புயலால் நாகப்பட்டினம், தஞ்சாவூர், புதுக்கோட்டை மாவட்டங்கள் எல்லாமே பாதிப்பை எதிர்கொண்டிருந்தாலும், மிக மோசமாக அழிவைச் சந்தித்திருப்பது நாகை மாவட்டத்தில் வேளாங்கண்ணியிலிருந்து கோடியக்கரை வரையுள்ள பகுதிகள்தான்.

இந்தப் பகுதியில் உள்ள நூற்றுக்கணக்கான சிறு கிராமங்கள், மீளவே முடியாத பெரும் பொருட்சேதத்தை எதிர்கொண்டிருக்கின்றன.

"இந்தக் கடையைப் பாருங்கள். இதிலிருந்து எனக்கு தினமும் என்ன வருமானம் கிடைத்திருக்கும்? இந்த சிறிய கடையை வைத்துத்தான் பிழைப்பை நடத்திக்கொண்டிருந்தேன். சனிக்கிழமை காலையில் வந்து பார்த்தால் பாதி கடையையே காணோம்" என்கிறார் வேட்டைக்காரனிருப்புக்கு அருகில் உள்ள ஒரு சிறிய கடையின் உரிமையாளரான இளஞ்செழியன். இவரது கடை இருப்பது ஒரு சிறிய கடை வீதி. ஆனால், புயலுக்குப் பின் அந்தப் பகுதியைப் பார்த்தால், ஏதோ மனித நடமாட்டம் இல்லாத பகுதியில் இருப்பதுபோன்ற தோற்றம் கிடைக்கிறது. அவரது கடை உட்பட அந்தப் பகுதியில் இருந்த வீடுகள், கடைகள், மரங்கள் அனைத்தும் கஜ புயலால் சூறையாடப்பட்டுவிட்டன.

அதே சாலையில் அடுத்தடுத்து உள்ள பூவைத்தேடி, காமேஸ்வரம், நாலுவேதம்பதி, தாமரைப்புலம், நாகரோடை,தோப்புத்துறை, விழுந்தமாவடி, கோவில்பத்து என வேதாரண்யம் வரையிலான கிராமங்களில் எல்லாம் வீடுகள், தோப்புகள், கடைகள் அழிந்துபோயுள்ளன.

இந்தப் பகுதியில் பெரும் எண்ணிக்கையில் தென்னை சாகுபடி நடைபெறுகிறது. அது தவிர, புளியமரம் போன்ற மரங்களின் மூலமும் விவசாயிகள் நல்ல வருவாயை ஈட்டிவந்தனர். பல குடும்பத்தினர், வீடுகளை ஒட்டியுள்ள நிலப்பகுதியில் சிறிய அளவில் தென்னந்தோப்பு, புளியந்தோப்பு ஆகியவற்றைப் பராமரித்து அவற்றிலிருந்து கிடைக்கும் வருவாயைக் கொண்டே வாழ்ந்துவந்தனர்.

AUMONERIE CATHOLIQUE TAMOULE INDIENNE 

Copyright © 2001-2017

EMAIL : webmaster@aumonerietamouleindienne.org